發布於 2026年5月29日·約 7 分鐘閱讀
「用戶體驗永遠係第一位，廣告商必須要 adapt to the market。」呢句說話，正正道出咗 Google I/O 2026 之後，整個數碼營銷行業嘅核心矛盾。當 Google 喺 2026 年 5 月 19 日嘅 Google I/O 2026 上正式宣布將 AI 全面融入現有生態系統，對普羅用戶嚟講絕對係喜訊，但對於廣告商而言，呢一刻簡直係晴天霹靂。Gemini AI 廣告已悄悄喺產品查詢對話中植入類似 Shopping Ad 嘅圖片廣告，而 Google Shopping Ad 曝光位置更由原本嘅 6 至 10 個產品大幅縮減至 2 個——呢一步，徹底重塑咗整個 Google PPC 廣告投放策略嘅遊戲規則。
重點
- Google I/O 2026 宣布 AI 全面整合，傳統搜尋頁面被 Gemini 對話介面逐步取代
- Gemini AI 廣告已悄悄喺產品查詢對話中植入類似 Shopping Ad 嘅圖片廣告
- Google Shopping Ad 曝光位置由原本 6 至 10 個產品大幅縮減至 2 個，廣告商曝光率大跌
- 用戶體驗大幅提升，但商家產品連結變得更隱蔽，需用戶主動點擊先見到
- Google PPC 廣告費用走向未明，預期 Google 將推出全新 AI 廣告產品及收費模式，marketer 必須擁抱改變、分散投放平台
Google PPC 廣告嘅黃金年代正式步入黃昏
喺 Google 落 PPC 廣告（Pay Per Click，單次點擊收費），從來都係廣告商用作為跑 lower funnel（營銷漏斗底部）嘅主要工具。多年嚟，透過 Google 廣告投放帶入自家網站、網店嘅客流量永遠都係最高質——即係話，呢班係最願意轉換嘅客戶。
而轉換目標其實好廣泛，包括：下訂單、登記服務、提交資料等。
正因如此，各個廣告商對於 Google 搜尋結果頁面「被 AI 取代」嘅擔憂，係絕對可以理解嘅。要跑數嘅廣告代理就更加頭痕——KPI 喺度，但 AI 時代數碼營銷嘅遊戲規則已經改變緊。
Gemini 實測發現：Google Shopping Ad 已悄悄滲透 AI 對話
啱啱今日，當我使用 Gemini AI 嘅時候，就發現 Google 已經靜悄悄喺產品查詢嘅對話裏面開始滲透唔同嘅廣告。
我用嚟測試嘅例子係對比兩個唔同牌子嘅 Sound Bar。Gemini 先用文字回覆對比結果，跟住再用表格顯示兩款 Sound Bar 嘅不同之處，但就喺表格上方完美融入兩張產品圖片，而且係帶有連結嘅。
呢個 Gemini 對話廣告模式，同之前喺搜尋頁面上邊所顯示嘅 Google Shopping Ad 一模一樣。
Shopping Ad 縮減：由 6-10 個產品變 2 個曝光位
不過要留意一個關鍵差異：Google Shopping Ad 本身可以顯示 6 至 10 個產品影像嘅廣告，即係話有多個品牌可以透過呢個廣告系統，將流量帶入自己嘅網站。
但係而家喺 Gemini 嘅表格上方，我淨係見到兩個品牌各一張圖片，而且點擊進去就如同早前嘅 Shopping Ad 搜尋結果頁面一模一樣。
換句話說，Shopping Ad 廣告位置由原本嘅 6-10 個，急劇收窄到 2 個——呢個曝光縮水程度，對 Google 廣告投放策略嚟講絕對唔係小事。
用戶贏咗，但商家輸喺起跑線：AI 廣告嘅雙刃劍
我認為依個係一個聰明嘅舉動。對於消費者嚟講，佢哋可以繼續透過 Google 嘅服務做到網上購物，而且比之前更加方便嘅地方係——唔需要睇搜尋結果頁面下便嘅一個個網站標題，直接點進圖片就可以睇得到 Google 上邊列出嘅唔同商家嘅產品價錢同網站連結。
但係對於商家嚟講，佢哋嘅產品連結會變得比之前更隱蔽，並唔係第一時間就可以俾消費者睇得到。
所以喺廣告商嘅身份嚟講，比同一嚿錢出去、落同一款廣告，但是收入有可能大不如前。由於以前有可能係叫做 guaranteed 一定會見到自己個網站、以及自己嘅產品圖片喺頭幾位，而家就必須要有個用戶主動地撳入嗰張圖片，先至有機會見到自己嘅廣告。
Google 廣告費會升定跌？AI 廣告收費模式徹底改寫遊戲規則
至於 Google 廣告費用會唔會因為依一啲改動而下調？廣告商又會唔會因為有依啲改動而去縮減佢哋喺 Google 上邊投放嘅年度廣告費用？
我嘅預測係：Google 好可能會推出全新嘅 AI 廣告產品同收費模式，例如以 AI 推薦次數計費，徹底改變我哋熟悉嘅 CPC 競價模式。
呢個唔係「加價」或者「減價」嘅問題，而係「重新定義廣告計費」嘅問題。
我嘅立場：用戶體驗永遠先行，marketer 必須擁抱 AI 時代數碼營銷改變
如果你問我，我會點睇？我嘅立場好清晰：
用戶體驗永遠係第一位，廣告商必須要 adapt to the market。
呢個唔係短期陣痛，而係長期嘅結構性改變。作為 marketer，與其抱怨，不如擁抱改變（embrace the change）。最重要嘅一點係：唔好再 stick with just one platform。當 Google 嘅生態系統開始重塑，聰明嘅廣告商應該開始將預算分散到唔同平台，任何時候將所有雞蛋放喺同一個籃，都係最危險嘅 AI 廣告投放策略。
結語：AI 廣告新時代，廣告商應對策略點部署？
Google I/O 2026 嘅呢一步，標誌住數碼廣告進入一個全新時代。傳統 Google PPC 廣告未必會即刻消失，但佢嘅黃金年代肯定已經過去。
如果你係廣告商，你又會點樣決定？
無論點揀，有一件事可以肯定——遊戲規則已經改變，唔變嘅人，遲早會被市場淘汰。
覺得這篇有用？我會分享每一個親手測試過的 MarTech × AI 工具與心得。
想討論合作 / coaching / freelance 專案？與我聯絡
